تۇڭعىش پرەزيدەنت قورىندا بىرىگەي زەرتتەۋلەر مەن ۇزدىك جوبا اۆتورلارىن انىقتاۋ داستۇرگە اينالعان. جاس عالىمدار مەن شىعارماشىل جاستاردى قولداۋ ماقساتىندا 2008 جىلدان بەرى بايقاۋ ۇيىمداستىرىلىپ, لاۋرەاتتار تاڭدالادى. كونكۋرس مۋزىكا, تەاتر جانە سۋرەت ونەرىنىڭ, كينەماتوگرافيا, كوركەم ادەبيەت, جۋرناليستيكا, فيزيكا, ماتەماتيكا, ينجەنەرلىك, قوعامدىق جانە گۋمانيتارلىق باعىتتار بويىنشا وتكىزىلەدى. وسى كۇنگە دەيىن 240 مامان «لاۋرەات» اتاندى. بۇگىن تاعى 18 تالاپشىل جاس قاتاردى تولىقتىردى. ناتيجەسىندە اتالعان كونكۋرس بويىنشا تۇڭعىش پرەزيدەنت قورىندا 258 لاۋرەات بار.
بۇگىنگى ماراپاتتاۋ شاراسىنا قر پارلامەنتى سەناتىنىڭ دەپۋتاتى, پارلامەنت سەناتى حالىقارالىق قاتىناستار, قورعانىس پەن قاۋىپسىزدىك كوميتەتىنىڭ توراعاسى, قازاقستان رەسپۋبليكاسىنىڭ تۇڭعىش پرەزيدەنتى – ەلباسى قورىنىڭ ديرەكتورى داريعا نازارباەۆا, قازاقتانداعى شەت ەلدەرىنىڭ توتەنشە جانە وكىلەتتى ەلشىلەرى, قر پارلامەنتىنىڭ دەپۋتاتتارى, قوعام قايراتكەرلەرى, عىلىم مەن مادەنيەت قىزمەتكەرلەرى, ۇەۇ وكىلدەرى جانە ت.ب. قاتىستى.
سىيلىق تاعايىنداۋ سالتاناتتى شاراسىن اشۋ بارىسىندا قر تۇڭعىش پرەزيدەنتى – ەلباسى قورىنىڭ ديرەكتورى داريعا نازارباەۆا جينالعان قاۋىمدى كەلە جاتقان العىس ايتۋ كۇنىمەن قۇتتىقتادى, لاۋرەاتتارعا العىس ءبىلدىردى: «قوردىڭ سىيلىعىنا قاتىسۋدا بەلسەندىلىك تانىتقان كونكۋرس قاتىسۋشىلارىنا العىس ايتامىن. سىزدەر وزدەرىڭىزدىڭ زياتكەرلىك, شىعارماشىلىق جۇمىسىڭىزبەن رۋحاني قۇندىلىقتاردىڭ نىعايۋىنا, ۇلتتىق مادەنيەتتىڭ دامۋىنا اتسالىسىپ, قازاقستان ءيميدجىن حالىقارالىق ارەنادا نىعايتىپ جۇرسىزدەر, ەلىمىزدىڭ ابىرويىن اسقاقتاتىپ جۇرسىزدەر. سىزدەرگە كوپ راحمەت! بارشاڭىزعا دەنساۋلىق, ساتتىلىك, قاجىماس قايرات تىلەيمىن. تۇڭعىش پرەزيدەنت قورىنىڭ سىيلىعى سىزدەرگە وزىڭىزگە دەگەن سەنىمدى ودان ءارى نىعايتىپ, ەڭ بيىك شىڭعا شىعۋعا كومەكتەسەدى. بارشاڭىزعا دەنساۋلىق, باقىت تىلەيمىن», - دەدى.
